नाही दिवा जरीही पडक्या घरात माझ्या

नाही दिवा जरीही पडक्या घरात माझ्या

संगीत : गायक : रफीक शेख

नाही दिवा जरीही पडक्या घरात माझ्या;
मी सूर्य पाळलेला आहे उरात माझ्या.

ओवाळुनी जिवाला मी टाकणार होतो;
नाही अजून आली दारी वरात माझ्या.

हे देह जाळणारे गाणे कसे म्हणू मी?
आक्रोश नववधूंचा येतो स्वरात माझ्या!

ज्यांची उद्या भरारी छेदेल अंबराला;
संचारली हवा ती ह्या पाखरात माझ्या!

होईल काय याचा अंदाज काय घेतो?
खवळून फक्त पाणी बघ सागरात माझ्या!

बघतो अता कसा हा पाऊस येत नाही;
मी वीज पेरली रे ह्या वावरात माझ्या.
---------------------------------------------
('अनुष्टुभ्' दिवाळी 1982 )

■ लेखन : ५ सप्टेबर १९८२