आजन्म रोज ज्यांनी केले नवे तमाशे

आजन्म रोज ज्यांनी केले नवे तमाशे;
तिरडीस तेच माझ्या झाले फितूर वासे.

मैत्री करून जमले बगळे सभोवताली;
टिपले हळूच त्यांनी माझ्या खिशात मासे.

दिसलेत मानभावी, होते कसाब सारे;
भिडले गळ्यास माझ्या त्यांचे उदार फासे.

अभिजात तोतयांनी केली हवेत भेसळ;
माझ्या मुक्या चुलीच्या देहात रक्त नासे.

फसव्या कटात त्यांनी केली शिकार माझी;
सोलून कातडीचे केलेत ढोल-ताशे.