"प्रिय श्रीकृष्ण राऊत,गझला वाचल्या. आवडल्या. तुम्हाला गझलरचनेची नस सापडली आहे.अभिनन्दन.तुमचा- पु.ल. देशपांडे,३एप्रिल,१९८९ '' ................................................... * स. न.वि.वि.आपला काव्यसंग्रह मिळाला. फार आभारी आहे. गझल प्रकारावर आपले चांगले प्रभुत्व आहे.कविता आशयसंपन्न,हृद्य आहे.धन्यवाद. - वि.वा.शिरवाडकर, २०/९/१९८९ *
तुझी दूर झाली पराधीन काया
इथे सोबतीला तुझी फक्त छाया
तशी राहिली ना हवा ही सुगंधी
उरे अत्तराचा रिकामाच फाया
कुठे सांग माळू अता मोगरा मी
तुझ्यावीण गेली फुले रोज वाया
किती मालवू मी दिवे आठवांचे
पुन्हा लागती ते मला चेतवाया
कधी श्वास वाटे जरा थांबलेला
कधी प्राण माझा बघे हा उडाया