"प्रिय श्रीकृष्ण राऊत,गझला वाचल्या. आवडल्या. तुम्हाला गझलरचनेची नस सापडली आहे.अभिनन्दन.तुमचा- पु.ल. देशपांडे,३एप्रिल,१९८९ '' ................................................... * स. न.वि.वि.आपला काव्यसंग्रह मिळाला. फार आभारी आहे. गझल प्रकारावर आपले चांगले प्रभुत्व आहे.कविता आशयसंपन्न,हृद्य आहे.धन्यवाद. - वि.वा.शिरवाडकर, २०/९/१९८९ *
इगो - इगोचे भांडण आहे
फक्त एवढे कारण आहे
उखळ कुणाचे, मुसळ कुणाचे
सतत मनाचे कांडण आहे
दिसेल त्याला शिंग मारतो
तुटली त्याची वेसण आहे
जादू करती डोळे घारे
मोहक जारणमारण आहे
किती जिवांची झाली माती
काय तुझे हे धोरण आहे ?
गळते छप्पर, झरती डोळे
कसा जाळतो श्रावण आहे !
द्या कर्जाला माफी राजे
घाम आमचा तारण आहे