जे जे समोर येते स्वीकार सर्व काही

जे जे समोर येते स्वीकार सर्व काही;
नाकारल्यास मित्रा ते दुःख तीव्र होई.

पाठीवरी अपेक्षा,डोक्यावरी समस्या;
अश्रू पुसून ओली झाली असेल बाही.

गर्दी असून रस्ता सुनसान वाटणारा;
पाहू नको तरीही मागे वळून बाई.

दु:खास धर्म नसतो,ना जात वेदनेला;
हे मर्म जाणणारा सर्वज्ञ मानतो मी!

ते यार चार खांदे अन् दोन उष्ण अश्रू;
ही एवढीच होती माझी खरी कमाई.


('मीडिया वाॅच' दिवाळी २०१५)