बंद कशाने पडली शाळा ; प्रश्न विचारा
दप्तर-पुस्तक चुलीत जाळा ; प्रश्न विचारा
कानावरती फक्त आकडे फेकत सुटले ;
तोंडाला त्या लावा टाळा ; प्रश्न विचारा
रंगदार हे सर्व निघाले रंग शेवटी
गोरा असेल किंवा काळा प्रश्न विचारा
डोळ्यांदेखत झाड वाळले तरणेताठे ;
केला तुमचा कुणी उन्हाळा ; प्रश्न विचारा
बहिण लाडकी जगते, भाऊ मरतो मुंज्या ;
या चालींना घाला आळा ; प्रश्न विचारा
स्वर्ग राहिला दोनच बोटे त्याच्यासाठी
श्रीमंतीचा कितवा माळा ? प्रश्न विचारा
कोणत्याही टिप्पण्या नाहीत:
टिप्पणी पोस्ट करा