केवळ टाळाटाळ सांगते,नंतर बोलू

केवळ टाळाटाळ सांगते,नंतर बोलू
आमंत्रण खास लबाडाचे,नंतर बोलू.
.

फक्त जराशी सुरसुर करून विझल्या वाती
फुसके सारे बार म्हणाले, नंतर बोलू.
.

सध्या नाही, आता नाही,थांब जरासा...
करून घे तू शंभर नखरे,नंतर बोलू
.

अजून गोळा झाली नाही हिम्मत मित्रा
एक आणखी पेग भरूदे, नंतर बोलू !
.

मुहूर्त शोधत पंचागाचे पान फाटले
सध्या साडेसाती आहे नंतर बोलू
.

नवीन आहे प्रेम आपले, स्तुती करू दे
चुका, उणीवा, दोष वगैरे नंतर बोलू.
.

गीता वाचुन काय फायदा गाढवांपुढे
आपण दोघे अती शहाणे नंतर बोलू.
.

बोलघेवडे,चिकणचोपडे बोल फोनवर
भेटीअंती निर्वाणीचे नंतर बोलू.
.