जातीत वाटलेला,धर्मात वाटलेला

जातीत वाटलेला,धर्मात वाटलेला;
सोयीनुसार मानव भेदात वाटलेला.

त्याला मनाप्रमाणे जगता कधी न आले;
प्रत्येक श्वास त्याचा नात्यात वाटलेला.

उकरून दोष माझे करती रवंथ शत्रू;
माझा भलेपणा मी मित्रात वाटलेला.

बाबास ठेव येथे,आई तुझ्याकडे ने;
वृद्धापकाळ त्यांचा पोरात वाटलेला.

फुकटात मार्गदर्शन  देऊन तज्ज्ञ गेले;
झाडून मार्ग काढा काट्यात वाटलेला.

नेत्यास द्या कलेजी,बाकी शिकार तुमची;
हिस्से करून बकरा चोरात वाटलेला!