त्या वाटेने प्रवास देवा नको आणखी

त्या वाटेने प्रवास देवा नको आणखी;
वळणावरचा सुंदर धोका नको आणखी.

तुटण्यासाठी गुंतत जाणे सतरा वेळा;
त्या धाग्याचा मनास टाका नको आणखी.

नकोस बोलू गोड एवढे...शंका येते;
पुन्हा चाखणे त्या जहराला नको आणखी.

कोटी इच्छा झाल्या पैदा तृष्णेपोटी;
विस्ताराचा पुरे पसारा,नको आणखी.

निरोप घेता घेता जातो उतू जिव्हाळा;
भेट कदाचित माझी त्यांना नको आणखी.

ज्याच्या खालुन जाता येता जीव घाबरे;
त्या वृक्षाची काळी छाया नको आणखी.