जी जाळते मला ती माझीच आग आहे

जी जाळते मला ती माझीच आग आहे;
आता कवेत घेणे कवितेस भाग आहे.

स्पर्शू नका फुलांना होईल सक्त मजुरी;
जन्मांध कायद्यांची राखीव बाग आहे.

जो ऐकताच झाले कित्येक लोक बहिरे;
गाण्यात कोणता हा भेसूर राग आहे?

होता जहाल मागे केव्हा तरी विषारी;
तो दंतहीन सध्या पाळीव नाग आहे.

समजून झोपलेला कापू नको गळा तू;
घालून तेल माझ्या डोळ्यात जाग आहे.

घाऊक आजचा हा बाजारभाव ताजा
स्वस्तात रक्त मिळते भाकर महाग आहे!

लेवून शुभ्र वस्त्रे झाकून घे कितीही;
केव्हा तरी तुझा तो दिसणार डाग आहे.

('दिशा' 1986)

■ लेखन : २० जून १९८३