लाभो अम्हा तुकोबा शेजार निंदकांचे

लाभो अम्हा तुकोबा शेजार निंदकांचे;
दारापुढे असावे ते दार निंदकांचे.

किरकोळ-थोर कोणी,आहे लहान-मोठा;
देवा,किती घडवले आकार निंदकांचे!

टीका करून त्यांनी आम्हास शुद्ध केले;
मानू हजार वेळा आभार निंदकांचे.

मिळतात ठोक येथे साबण त-हेत-हेचे;
दुनियेस स्वच्छ करती बाजार निंदकांचे.

ज्ञानेश्वरास छळती,पिळतात जे तुक्याला;
पाहून घ्या विठोबा अवतार निंदकांचे!

स्वर्गात थेट नेते त्यांची विमानसेवा;
झाले अनंत कोटी उपकार निंदकांचे!

('मीडिया वाॅच' दिवाळी २०१५)