फुले कागदी बघता इथली फूल माळणे जमले नाही

फुले कागदी बघता इथली फूल माळणे जमले नाही;
बागेच्या ह्या रूपावरती मला भाळणे जमले नाही.

दुकान मांडुन विकल्या जाती जेथे वचने,आणाभाका;
त्या प्रेमाच्या बाजाराचा शब्द पाळणे जमले नाही.

दिवे भेटले अनेक पण ते अंधाराचे मिंधे होते;
पतंग होउन अशा दिव्यांवर जीव जाळणे जमले नाही.

प्रत्येकाच्या पापणीतला अथांग सागर जेव्हा कळला;
थेंब एकही अश्रूंचा मग मला ढाळणे जमले नाही.

झाले नसते तशी कधीही कोण्या दुःखाची मी राणी;
हट्टच धरला दुःखांनी मग मला टाळणे जमले नाही.
------------------------------
('मेनका' दिवाळी 1982)
■ लेखन : २९ ऑगस्ट १९८२