आजकाल वाटती ना मला खरे दिवस

आजकाल वाटती ना मला खरे दिवस;

यायचे कधी प्रिये आपले बरे दिवस.

देहविक्रयावरी रात्र सांज भागवी;

थंड बैसला मुका काय हा करे दिवस?

बेगडी प्रकाश अन् बेगडीच सूर्य हा-

दाटल्या तमातला आज गुदमरे दिवस

पापण्यापल्याडची झेलता व्यथाफुले

लोचनात हास-या हळूच पाझरे दिवस.

वाटते पिकावरी टोळधाड यायची;

एरवी उगाच ना फार थरथरे दिवस.

रात्र उंदिरापरी काळजास कुरतडे

अन् सुळावरी जसा रोजचा सरे दिवस.