बाप चोर, लेक चोर, खानदान चोरटी

बाप चोर, लेक चोर, खानदान चोरटी;
शानदार सूर्यवंश, फक्‍त शान चोरटी.

थंडगार स्वागतास अंगणात ठेवली,
चरण स्पर्शते लवून लॉन छान चोरटी.

आणली कुठून ही? विचारता असे कसे?
नेकलेस आमचीच,फक्‍त मान चोरटी.

मैफलीस जिंकण्यास मोकळे खुलून गा;
घेत काय बैसला गळ्यात तान चोरटी.

रात्र खूप उलटली व दूर राहिले शहर;
घ्या धकून आज हीच गावरान चोरटी.

ऐकवू नकोस तू तुझी नवी नवी गझल;
भोवताल मंडळी इथे महान चोरटी.