बेरंग बाग झाली; कोठे सुगंध गेले?

बेरंग बाग झाली; कोठे सुगंध गेले?

येथे ऋतूऋतूंनी चाळे अनेक केले.

पोलाद शब्द सगळे हे ओकतात भूसा;

की प्रस्थ वाळवीचे भलतेच माजलेले?

पंचांग सांगते की होईल खूप वर्षा;

नवजात शेत माझे संपूर्ण वाळलेले.

डोळ्यात वीज माझ्या, ओठावरी निखारे;

माझ्या उरात ताजे हंगाम पेटलेले.

आहे तसाच आणा काळा चहा गडे हो;

येथील दूध सारे बोके पिऊन गेले.

वाफ्यातले जुने हे बदलू जरा बियाणे;

तेव्हा कुठे इथेही उगवेल पेरलेले.

---------------------------------------
('आविष्कार' दिवाळी 1982)
■ लेखन : १९७९

_____________________________________