१०.११.०८

असे जीवना तू किती घात केले

असे जीवना तू किती घात केले;
मला तू खरेदी लिलावात केले.

किती झाकल्या मी व्यथा अंतरीच्या;
उगा स्पष्ट त्यांना खुलाशात केले.

तुला सांग दुःखा कसा मित्र मानू?
हवे तेवढे तू न आघात केले.

तुला एक साधे कमळ दे म्हणालो;
किती खून तू या तलावात केले.

पुरे खंडले रे अखंडत्व माझे;
किती खंड माझे नकाशात केले.

तुला शोभले का अरे ईश्वरा हे-
भिका-याप्रमाणे पुढे हात केले.

1 टिप्पणी:

Mahesh Savale म्हणाले...

वा सर खूप छान......ही गजल मला मनापासून आवडली.........