पुन्हा भेट होणे नसावी कदाचित

पुन्हा भेट होणे नसावी कदाचित
असावी तिची हीच मर्जी कदाचित
.
जिथे तोतयांची भरे रोज जत्रा
तिथे दैवतेही दुतोंडी कदाचित
.
तुम्हाला बनवते खुळा जी कधीही
तिचे नाव आहे प्रसिद्धी कदाचित
.
तुला मुक्त केले तुझ्या मालकाने
तुला गोड वाटे गुलामी कदाचित
.
उभा काळ होता मला न्यावयाला
तुझी आड आली भलाई कदाचित
.
अहंकार नाही मला कोणताही
असे मीच मोठा निगर्वी कदाचित !