उल्लेख टाळलेल्या आहेत खूप गोष्टी

उल्लेख टाळलेल्या आहेत खूप गोष्टी;

शास्त्रोक्त गाडलेल्या आहेत खूप गोष्टी.

द्यावा कसा पुरावा नाही ठसा कुठेही;

साद्यंत चाळलेल्या आहेत खूप गोष्टी.

डोळ्यात धूर जाता केकाटली स्मशाने-

संपूर्ण जाळलेल्या आहेत खूप गोष्टी.

अर्ध्यात संपलेल्या समजून घ्या कहाण्या;
अर्ध्यात फाडलेल्या आहेत खूप गोष्टी.

नादार लक्तरांची भांबावते उधारी;

मुद्दाम नाडलेल्या आहेत खूप गोष्टी.

निर्माल्य जीवनाचे शोधू कुठे, कसा मी?

पाण्यात सोडलेल्या आहेत खूप गोष्टी!