दडपणे दूर ही सारा, जरासा श्वास घेऊ द्या

दडपणे दूर ही सारा, जरासा श्वास घेऊ द्या;

नका बांधू कुणी वारा,जरासा श्वास घेऊ द्या.

जिवाची काहिली होते गुलाबाच्या,चमेलीच्या;

जरासे ऊन नाकारा, जरासा श्वास घेऊ द्या.

असे अवतार तुमचा रे, नसे तो रेसचा घोडा;

कधी नापास स्वीकारा,जरासा श्वास घेऊ द्या.

उभे आयुष्य काट्याच्या अणीवर काढले त्यांनी,

मुखावर वाजले बारा,जरासा श्वास घेऊ द्या.

कधी तर चोपडी फेका नफा-नुकसान नोंदीची;

करा त्या बंद व्यापारा, जरासा श्वास घेऊ द्या.

जिथे चौरंग सोन्याचा,छतालाही जिथे चांदी;

सदा तो बंद गाभारा,जरासा श्वास घेऊ द्या.

असे जे मूळ दु:खाचे,असे कारण वितुष्टाचे-

अपेक्षांचा नको मारा, जरासा श्वास घेऊ द्या.

_________________________

  ('कविता-रती' दिवाळी 2010)