उभे चौकात वाटाडे, नको त्यांच्याकडे जाऊ

उभे चौकात वाटाडे, नको त्यांच्याकडे जाऊ;
पुढे गेल्यावरी वाटा निघाल्या सर्व टाकाऊ.

जसा तो बोलतो आहे तसा तो चालला नाही;
तुकारामास नव्हता रे कुणीही पाठचा भाऊ.

मिटेना भूक लाचेची हजाराने न लाखाने;
अता सांभाळ बाबा तू मुलांचा मोजका खाऊ.

हवा येथील देवांना बळी द्याया नवा बकरा;
उद्या आहे तुझी पाळी नको तू फार सोकावू.

तुला जर प्रेम आहे तर उरी कवटाळ जखमांना;
असा लांबून काडीने नको तू औषधी लावू.