हा प्रश्न एकदाचा लावा धसास राजे

हा प्रश्न एकदाचा लावा धसास राजे;
टांगून ठेवलेले त्याला कशास राजे.

छातीवरील जागी कोटात छान दिसती;
फेकू नका फुलांना घेऊन वास राजे.

सांगू किती नवाई ह्या धूर्त कावळ्यांची;
ताटामधून नेती काढून घास राजे.

सेतू तसा नवा, पण हा कोसळेल केव्हा-
याचा अचूक पक्का बांधा कयास राजे.

जेवण नसेल तर मग सांगा खुशाल चुटके;
जनता सभेत बसली आहे उदास राजे.

दुष्काळग्रस्त गावे देतात ह्या शुभेच्छा-
होवो सदा सुखाचा तुमचा प्रवास राजे.
---------------------------------------------
('शब्दालय' दिवाळी 1987)