दु:ख देखणे तुझे,देखणा वसंत तू

दु:ख देखणे तुझे देखणा वसंत तू

संगीत : गायक : भीमराव पांचाळे

दु:ख देखणे तुझे,देखणा वसंत तू;
घाव सांगतातना आजही पसंत तू.

सोसतात लोक हे लाख यातना पहा;
वागवीत बैसला काय एक खंत तू.

वाटल्यास गाळ तू लपून दोन आसवे;
भाषणा, करू नको मरण शोभिवंत तू.

येथली जमीनही नीट ना कळे तुला;
वाचतोस सारखा काय आसमंत तू.

लोचनात ओतुनी प्राण वाट पाहतो;
आणखी बघू नको फार वेळ अंत तू.

स्वर्ग छान कल्पना,मोक्ष फालतूपणा;
चालला कुठे असा शोधण्या दिगंत तू.
-------------------------------------------
( 'तरुण भारत' 15 जून 1980)