वैशिष्ट्‌यपूर्ण आहे एकेक भामटा

वैशिष्ट्‌यपूर्ण आहे एकेक भामटा;
तो साव भामटा अन् हा नेक भामटा.

जनतेस भाकरीने खाऊन टाकले;
खुर्चीत खात आहे पण केक भामटा.

ज्याने न कापसाचे विकलेत बोंडही;
वटवून घेत आहे तो चेक भामटा.

ज्यांना तहान त्यांना पाणी न पाजतो;
देवास घालतो पण अभिषेक भामटा.

विश्वास नाव ह्याचे हा तज्ज्ञ घातकी;
स्नेहातही करे जो अतिरेक भामटा.

गावास आग लावी,देशासही कधी;
लागू न दे स्वत:ला पण शेक भामटा!

राज्यात कोतवाली त्यालाच लाभते;
लाचेत देत आहे जो लेक भामटा.
-------------------------------------------
('तरुण भारत' दिवाळी 1989)